Dixitalización, web e redes sociais con ata un 80 % subvencionado
Se tes un pequeno comercio ou es autónomo/a en Galicia, esta nova convocatoria da Xunta pode interesarche (e moito). Falamos das axudas para o impulso da innovación e a sustentabilidade do comercio local (CO300C), unha liña pensada para axudar aos negocios a modernizarse, mellorar a súa presenza dixital e adaptarse ás novas formas de vender e comunicarse.
E o mellor de todo: a subvención pode cubrir ata o 80 % do investimento.
A quen van dirixidas estas axudas?
Estas axudas están pensadas para pequenos negocios reais, dos de persiana subida todos os días. Poden solicitalas pemes e persoas autónomas con actividade en Galicia que teñan ata 10 persoas empregadas e desenvolvan a súa actividade nun establecemento comercial de ata 300 m² (agás algunhas excepcións, como as moblerías).
Tamén poden beneficiarse obradoiros artesanais, sempre que estean inscritos no Rexistro Xeral de Artesanía de Galicia.
Iso si, a actuación que se solicite debe ter relación directa coa actividade principal do negocio. Non se trata de “pedir por pedir”, senón de mellorar realmente o teu comercio.
Que tipo de proxectos se poden subvencionar?
Aquí vén unha das partes máis interesantes da convocatoria, porque inclúe actuacións moi habituais e necesarias hoxe en día.
Por exemplo, a creación ou mellora dunha páxina web entra de cheo na axuda. Falamos de webs ben feitas, seguras, adaptadas a móbil, con certificado SSL, textos legais, xestor de cookies, analítica web e unha base mínima de SEO para que Google saiba que existes. Todo iso pode subvencionarse cun investimento máximo de 1.200 €.
Se ademais vendes (ou queres vender) por internet, tamén se inclúen tendas online, sempre que conten cun sistema de xestión de vendas, pasarela de pago e unha parte significativa do catálogo dispoñible en liña.
Outro punto forte da convocatoria é o posicionamento dixital. Accións de SEO, SEM ou publicidade online están subvencionadas ata un máximo de 2.500 €, o que permite traballar a visibilidade do negocio con certa marxe e estratexia.
E, por suposto, tamén entra a xestión profesional das redes sociais. A axuda contempla servizos que inclúan publicacións semanais, planificación de contidos, formatos variados (texto, imaxe, vídeo, stories…) e creación de contido de calidade que mellore a imaxe da empresa. Neste caso, o investimento máximo subvencionable é de 2.000 €.
Ademais, a convocatoria tamén recolle outras actuacións como software de xestión, TPV, ciberseguridade, click & collect, chatbots, aplicacións móbiles ou escaparates virtuais. En conxunto, a inversión máxima subvencionable dentro desta liña pode chegar ata os 18.750 €.
Canto subvenciona a Xunta?
A axuda cobre o 80 % do investimento, sempre que o proxecto teña un importe mínimo de 1.000 € (IVE excluído). Ademais, en determinados casos, é posible solicitar un pago anticipado do 50 % da subvención, algo especialmente interesante para pequenos negocios.
Prazos que non podes perder de vista
As solicitudes poden presentarse dende o 16 de xaneiro de 2026 ás 9:00 h ata o 16 de febreiro de 2026 ás 20:00 h, ou ata que se esgoten os fondos.
Unha vez pechado o prazo, a Administración ten ata catro meses para resolver. Se non hai resposta nese tempo, o silencio administrativo é negativo (por iso é importante facelo todo ben dende o principio).
No caso de resultar beneficiario/a, o prazo para xustificar a axuda é de tres meses dende a notificación da concesión, cunha data límite fixada no 13 de novembro de 2026.
Como se presenta a solicitude?
A solicitude realízase a través da sede electrónica da Xunta de Galicia, empregando certificado dixital ou a chave 365. Ademais da solicitude, será necesario presentar a documentación correspondente e, máis adiante, xustificar correctamente o investimento realizado.
E aquí entra Díxome
En Díxome levamos tempo acompañando a comercios e autónomos neste tipo de procesos. Axudámosche a:
Ver se o teu negocio cumpre os requisitos
Definir que actuacións encaixan mellor na axuda
Executar o proxecto (web, redes sociais, posicionamento, dixitalización…)
E deixar todo listo para unha xustificación sen sobresaltos
Falamos claro, sen letra pequena e con solucións adaptadas á realidade de cada negocio.
Se queres saber se estas axudas son para ti, fala con nós.
